SA PU PAPUA

                      

Su terlalu banyak darah yang tertumpah di tanah ini

Dari tahun 1960an sampe skarang

Entah su brapa banyak nyawa yang melayang

Semua bagaikan film perang dilayar tayang

Yang selalu ada dalam sa pu bayang-bayang

Dong bilang tanah ini kaya dan permai

Tapi macam tanah ini trada damai

Setiap tahun pasti ada korban yang berjatuhan

Entah dari pihak aparat Indonesia atau pejuang dan rakyat Papua

Dong bilang Papeda itu Papua penuh damai

Tapi yang terasa seperti…

 Papua penuh darah

Ya… Papua penuh darah

Padahal, Sa Cuma ingin hidup damai

Tapi macam kedamaian itu jauh dari Tanah Papua

Dong bilang tanah ini diberkati

Tapi kenapa berkat itu direbut bangsa-bangsa lain?

Semua datang cari makan disini

  bikin pribumi tersisih

pusat kasih otsus, yang harusnya menjadikan Papua punya kekhususan

tapi macam abunawas k…

pelanggaran HAM Terjadi dimana-mana

pelakunya paling diskors, bahkan ada yang jabatannya naik

bahkan ada yang jadi penguasa

terus kasusnya tra pernah diselesaikan yang hanya bikin orang papua sakit hati

dan benih-benih perlawanan makin subur

sa sempat berpikir, apakah sa pu papua Cuma jadi tempat “proyek”

atau Papua ini piring makan bangsa lain

sampe tuan rumah Cuma harus dapat ampas-ampas saja

dari diskriminasi ke kriminalisasi

orang-orang yang menuntut haknya, pasti dapat cap separatis

ditangkap, ditahan, dipenjara atas nama keamanan negara

lebih sadisnya ada yang sampai harus dibunuh

setiap ada gejolak selalu diberi tindakan militer

semua orang yang minta keadilan di stigma separatis

separatis-separatis dan separatis

padahal bagi kami, itu nasionalis

kasus rasisme di Surabaya

kitong pu sodara-sodara yang jadi korban diperlakukan seperti teroris

apa susahnya masuk panggil dong baik-baik?kenapa musti pakai gas air mata?

Kitong disini marah, kam tangkap dan tahan cepat

Tapi dong yang bataria kitong pu sodara deng kata-kata rasis

Hilang dari peredaran

Kitong bela kitong pu sodara di Surabaya

Kam kirim aparat tambah datang

Kas putus jaringan komunikasi

Sampe kriminalisasi semua yang dukung kitong

dong ganti kitong pu pola makan juga

dari kasbi, petatas, pisang, sagu dong ganti ke beras

dulu kitong tratau penyakit gula

tapi sekarang orang Papua banyak kena diabetes

makan raskin supaya dicap miskin

dong kasih mie instan supaya kitong pu hidup instan

padahal kitong pu tanah kaya, tapi dong rubah kitong pu pola pikir

karna terlalu makan manis-manis

sama deng anak kecil yang dapat kas gula-gula supaya tra melawan orang tua baru diam tenang

budaya juga semakin terkikis

dulu kalo acara-acara budaya tarian adat dari daerah jadi primadona

tapi skarang,,, macam sio saja

bahasa daerah juga su dilupakan

karna bahasa persatuan yang dong agung-agungkan

pakaian adat su tra lagi keren

kebaya kini beken

keladi tumbuk su tra lagi disukai

tumpeng nasi kuning yang kuasai

sioo sa Pu Papua

  

Sa bahagia pu alam yang kaya

Sa bangga pu suku yang banyak

Dan bahasa daerah serta kebudayaan yang beragam

Sa bangga pu pulau-pulau indah

Sa bangga pu pantai yang mempesona

Sa bangga pu hutan yang sediakan kebutuhan masyarakat adat sejak dahulu kala

Sa bangga pu pegunungan yang puncaknya ditutupi salju

Sa bangga pu Papua

Sa dari suku Biak

Sa dari wilayah adat saireri

Sa ras Melanesia

Sa pu negeri Papua

Sa pu Bangsa Papua

Tapi kenapa sa pu negara Indonesia?

  

 VERSI YOUTUBE

https://www.youtube.com/watch?v=tg8FvlyqjJA&t=14s